Brasilíski hægri bakvörðurinn Dani Alves er án félags og verður það til áramóta en hann segir á Instagram að hann ætli að bíða rólegur og sjá hvað býðst á nýju ári.
Alves er 38 ára gamall og á met yfir flesta titla á atvinnumannaferlinum en hann bætti bikar í skápinn í sumar er hann vann Ólympíuleikana með brasilíska landsliðinu.
Hann samdi við brasilíska félagið Sao Paulo árið 2019 eftir að hafa spilað með Sevilla, Barcelona, Paris Saint-Germain og Juventus í Evrópu, en rifti samningnum fyrir nokkrum dögum vegna vangoldinna launa.
Alves er ekki að flýta sér að finna sér nýtt félag en hann mun skoða stöðuna eftir áramót. Möguleiki er á að hann fari aftur til Evrópu eftir að hafa upplifað drauminn að spila þann æskudraum að spila með Sao Paulo.
Markmið hans er að fara með brasilíska landsliðinu á HM í Katar áður en hann leggur skóna á hilluna.
Athugasemdir
