Arnór Ingvi Traustason
„Þetta var kannski ekki okkar besti leikur, en það var sætt að setja eitt í lokin,“ sagði Arnór Ingvi Traustason í viðtali í útvarpsþættinum Fótbolti.net.
Arnór Ingvi skoraði mark Íslands í 2-1 tapinu gegn Dönum síðastliðinn fimmtudag, en Arnór hefur stimplað sig vel inn í íslenska landsliðshópinn.
Arnór Ingvi skoraði mark Íslands í 2-1 tapinu gegn Dönum síðastliðinn fimmtudag, en Arnór hefur stimplað sig vel inn í íslenska landsliðshópinn.
„Um leið og maður fær sénsinn þá reynir maður að nýta hann sem best og ég reyni að gera mitt allra besta. Ég náði inn þarna marki sem var kærkomið,“
Arnór Ingvi varð sænskur meistari með liði sínu Norrköping í október og var í framhaldi af því valinn í landsliðshópinn. Hann er sjálfur ánægður með hvernig hlutirnir hafa gengið og er með sjálfstraustið í botni.
„Seinasta ár var mjög gott fyrir mig og bara fyrir Norrköping í heild. Ég dett svo inn í landsliðið í nóvember og reyni að halda áfram að standa mig og er núna búinn að vera í hóp í nóvember, janúar og núna. Maður getur nú alveg stigið feilspor, en ég er með sjálfstraustið í botni.“
„Það er gríðarlega skemmtilegt að vera í landsliðshópnum og þegar maður er kominn hér inn þá vill maður ekkert detta út. Strákarnir hafa hjálpað mér mikið að komast meira og meira inn í hópinn og mér líður vel.“
Ísland mætir Grikklandi á þriðjudaginn og Arnór segir ekkert annað en sigur koma til greina í þeim leik.
„Það eru núna Grikkirnir og við erum aðeins búnir að fara yfir þá, en það kemur ekkert annað til boða en að vinna þann leik. Við erum búnir að tapa fjórum eða fimm vináttulandsleikjum og við eigum að geta gert betur,“ sagði Arnór Ingvi, en hér í spilaranum að ofan má hlusta á viðtalið við hann í heild sinni.
Athugasemdir
