KFR og Álafoss voru þegar búin að tryggja toppsæti sinna riðla fyrir leiki kvöldsins og því var aðeins verið að berjast um 2. sæti hvors riðils.

Í A-riðli endar Skallagrímur í öðru sæti og fær því að leika úrslitaleiki um sæti í 4. deild við KFR. Skallagrímur rúllaði yfir botnlið Reynis frá Hellissandi í gær.

Carlos Javier Castellano skoraði þrennu á ellefu mínútna kafla í fyrri hálfleik og setti fjórða markið í upphafi síðari hálfleiks. Guðjón Andri Gunnarsson lagði sitt af mörkum með tvennu svo lokatölur urðu 8-1 fyrir Skallagrím.

Skallagrímur endurheimti annað sætið af Smára. Skallagrímur endar með 29 stig eftir 14 umferðir, tveimur stigum fyrir ofan Smára.

Í B-riðli var ótrúleg dramatík þar sem Úlfarnir og BF 108 fengu óvænt tækifæri til að berjast um annað sætið eftir tap Spyrnis á Stokkseyri í lokaumferðinni. Spyrnir tapaði fyrir botnliði Stokkseyrar og missti þannig af tækifærinu til að tryggja sér 2. sæti riðilsins.

BF 108 lagði RB að velli til að klifra yfir Spyrni á stöðutöflunni en það dugði ekki til, Úlfarnir rúlluðu yfir Þorlák og tóku þannig framúr Boltafélaginu á markatölu.

BF byrjaði daginn með betri markatölu, en Úlfarnir gerðu sér lítið fyrir og unnu með átta marka mun gegn Þorláki. Til gamans má geta að Þorlákur vann frækinn sigur á toppliði KFR fyrr í ágúst.

Úlfarnir enda því í öðru sæti, með 26 stig og 13 mörk í plús. BF er með 10 mörk í plús.

Úlfarnir mæta Álafossi í úrslitaleikjum um sæti í 4. deildinni.

Sigurvegarar úrslitaleikjanna mætast svo í hreinum úrslitaleik um titilinn 5. deildarmeistari 2025. Sá úrslitaleikur er aðallega upp á stoltið þar sem bæði félögin fara hvort sem er upp um deild.