Bukayo Saka og Martin Ödegaard fóru báðir af velli í 5-0 stórsigri Arsenal á Leeds í gær en óttast var að þeir yrðu frá í að minnsta kosti nokkrar vikur. Sky Sports segir meiðslin ekki jafn alvarleg og óttast var í fyrstu.
Norðmaðurinn fór af velli í fyrri hálfleik vegna eymsla í öxl á meðan Saka fann til aftan í læri og þurfti að fara af velli strax í byrjun síðari hálfleiks.
Saka var frá í þrjá mánuði á síðustu leiktíð vegna meiðsla aftan í læri og því kannski eðlilegt að hafa áhyggjur af þessu.
Mikel Arteta, stjóri Arsenal, sagði eftir leikinn að það þyrfti eitthvað mikið til að Saka færi af velli og óttaðist hann það versta, en Sky segir andrúmsloftið töluvert betra eftir fyrstu niðurstöður úr rannsóknum.
Ekki er alveg vitað hvort þeir verði klárir fyrir stórleikinn gegn Liverpool í næstu umferð, en horfurnar eru góðar.
Athugasemdir
