Stjarnan mun spila í forkeppni Sambandsdeildar Evrópu á næsta ári þrátt fyrir að hafa tapað fyrir Breiðabliki, 3-2, í sannkölluðum Evrópuslag á Samsung-vellinum í Garðabæ í kvöld.

Stjörnumenn voru með þriggja stiga forystu á Blika fyrir leikinn í baráttunni um þriðja sætið og vissu Blikar að þeir þyrftu að vinna með að minnsta kosti tveimur mörkum.

Aron Bjarnason komst nálæg því að taka forystuna fyrir Blika á 9. mínútu en skot hans hafnaði í þverslá en aðeins þremur mínútum síðar kom Benedikt Warén Stjörnumönnum yfir gegn uppeldisfélaginu.

Örvar Eggertsson kom sér inn í teiginn, féll við, en var fljótur að koma sér aftur á lappir áður en hann kom boltanum út á Benedikt sem skoraði.

Róðurinn þungur fyrir Blika sem þurftu þrjú mörk til þess að komast í Evrópu.

Anton Logi Lúðvíksson gaf þeim svo sannarlega von með einu af mörkum tímabilsins. Á 19. mínútu var boltinn hreinsaður hátt úr teignum og á Anton sem stóð fyrir utan teig. Hann tók boltann á bringuna og hamraði honum síðan í samskeytin. Stórbrotið mark hjá Blikanum.

Eftir rúman hálftímaleik gátu Blikar tekið forystuna er Anton kom boltanum út á Aron Bjarna sem reyndi skotið en Árni Snær Ólafsson varði frábærlega aftur fyrir endamörk.

Örvar Eggerts kom Stjörnumönnum yfir aðeins örfáum mínútum síðar með viðstöðulausu skoti. Hans fjórtánda mark í deildinni og það fjórða eftir tvískiptingu.

Blikar voru nálægt því að svara fyrir lok hálfleiksins en aftur var tréverkið fyrir. Í þetta sinn var það Kristófer Ingi Kristinsson sem skallaði fyrirgjöf Óla Vals Ómarssonar í slá.

Snemma í þeim síðari áttu Blikar enn eina tilraunina í þverslá, sem var heldur betur að koma heimamönnum til bjargar í leiknum. Samúel Kári Friðjónsson fleygði sér fyrir fyrirgjöf Blika og þaðan fór boltinn í slánna áður en Aron Bjarna skaut frákastinu í varnarmann og aftur fyrir.

Örvar var hársbreidd frá því að bæta við öðru marki sínu í leiknum um það bil fjórum mínútum síðar en skot hans í stöng. Tréverkið lék aðalhlutverkið í þessum leik, svo vægt sé til orða tekið.

Blikar höfðu verið óheppnir að skora ekki meira en eitt mark, en loks féll eitthvað með þeim er fyrirliðinn Höskuldur Gunnlaugsson jafnaði metin með hörkuskoti eftir að Damir Muminovic skallaði boltann á hættusvæðið þar sem Höskuldur var mættur til að setja boltann í netið.

Stjörnumenn lögðust aftar á völlinn og héldu Blikar áfram að pressa þá, en vantaði aðeins upp á hjá þeim.

Á 77. mínútu kom sláin sér að góðum notum fyrir Blika eftir að hafa valdið þeim miklum óþægindum í leiknum. Höskuldur fékk boltann fyrir utan teig og smellti honum í slá og inn. Mark úr efstu hillu og Blikar einu marki frá því að koma sér í Evrópu.

Rafmagnaðar lokamínútur í Garðabæ og vissu bæði lið það að næsta mark yrði það mikilvægasta.

Á síðustu sekúndum leiksins komust Blikar grátlega nálægt því að tryggja Evrópusætið en heppnin var bara ekki með þeim. Höskuldur átti svakalega hjólhestaspyrnu sem hafnaði enn og aftur í slánni.

Það var það síðasta markverða sem gerðist í leiknum og voru það Stjörnumenn sem fögnuðu af innlifun í leikslok þrátt fyrir að hafa tapað leiknum

Stjarnan tók 3. sætið með 42 stig en Blikar missa af Evrópu á næsta ári og hafna í 4. sæti með 42 stig en með lakari markatölu. Frábært tímabil hjá Stjörnumönnum sem snúa aftur í Evrópu.