Manchester United er að ganga frá kaupum á kólumbíska táningnum Cristian Orozco frá Fortaleza. Þetta segir Fabrizio Romano á X.
Orozco er 17 ára gamall miðjumaður sem er samningsbundinn Fortaleza í heimalandinu og á þrettán leiki með yngri landsliðum Kólumbíu.
Romano segir Man Utd hafa náð samkomulagi við félagið um kaup á Orozco en hann kemur til með að kosta tæp 800 þúsund pund.
Miðjumaðurinn mun ferðast til Bretlandseyja á næstu dögum til að ganga frá skiptunum og mun síðan formlega ganga í raðir United þegar hann fagnar 18 ára afmæli sínu í júlí á næsta ári.
Orozco er varnarsinnaður miðjumaður sem er sagður svipa til Moises Caicedo hjá Chelsea, en United ætlaði sér einmitt að fá Caicedo árið 2021.
Vandamál komu upp í viðræðum við umboðsmenn Caicedo og hætti United að eltast við Ekvadorann sem fór síðar til Brighton og þaðan til Chelsea fyrir metfé.
Athugasemdir
