„Það er alltaf rosalega gaman að koma og hitta stelpurnar. Við erum öll mjög hress hérna og tilbúin í þetta."

„Austurríki hefur spilað vel í undanförnum leikjum en við erum líka með mjög sterkt lið. Ég held að þetta verði góðir leikir, báðir tveir," segir Ásdís en hún fagnar því að fá kallið aftur í hópinn eftir að hafa komið inn í síðasta verkefni. „Það er mjög skemmtileg. Ég vil alltaf vera hérna."

Leikmennirnir finni ekki fyrir þessu
Ásdís er að spila í Noregi með Lilleström þar sem hún er í mikilvægu hlutverki, en það hefur gengið mikið á hjá félaginu á síðustu vikum. Lilleström er nálægt gjaldþroti og hefur gripið til nauðsynlegra ráðstafana vegna þess. Ásdís var í dag spurð út í stöðuna hjá Lilleström.

„Stemningin er bara mjög góð í liðinu. Við ættum kannski að vera komnar með fleiri stig en við erum með. Höfum verið svolítið óheppnar. Við höfum verið að spila vel," segir Ásdís en er staða félagsins að hafa mikil áhrif á hópinn?

„Nei, ég myndi ekki segja það. Þegar fólk spyr mig um þetta, þá hugsa ég meira um þetta. Ég held að stelpurnar séu mjög fókuseraðar á að gera vel og reyna að fá eins mörg stig og við getum, sérstaklega þegar það er búið að taka stig af okkur. Þetta er reyndar bara eitt stig, en það er samt ömurlegt. Þetta er auðvitað leiðinlegt en félagið er að gera mjög vel í að láta okkur leikmennina ekki finna fyrir þessu."

Ásdís segir að lífið fyrir leikmennina sé áfram venjulegt, það sé borgað á réttum tíma og þess háttar.

„Við höfum fengið allt eins og venjulega. Það voru einhverjar fréttir um að við værum ekki að fá mat og eitthvað, en ég hef alveg fengið að borða (á æfingasvæðinu)," sagði Ásdís og hló. „Maður vonar að það haldist áfram svona."

Ásdís er á sínu fyrsta ári í atvinnumennsku en hún gekk í raðir Lilleström. Hún kveðst vera ánægð með að hafa tekið þetta skref en allt viðtalið við hana má sjá í spilaranum hér að ofan.