Cole Campbell ætlar að fara frá Dortmund í janúar
Íslenski-bandaríski leikmaðurinn Cole Campbell vill fara frá þýska stórveldinu Borussia Dortmund í janúarglugganum en stærstu miðlarnir í Þýskalandi greindu frá þessum tíðindum um helgina.
Tækifærin hafa verið af skornum skammti hjá Cole sem er 19 ára gamall sóknarmaður, en hann hefur aðeins leikið 16 mínútur með aðalliðinu á þessari leiktíð.
Cole er ekki að sjá fram á að geta brotið sér leið inn í liðið og hefur því óskað eftir því að fara frá félaginu.
Anderlecht, Club Brugge, Elversberg og Midtjylland eru öll sögð vilja fá Cole, en Mike Tullberg, fyrrum þjálfari Cole í vara- og unglingaliði Dortmund, stýrir Midtjylland. Landsliðsmarkvörðurinn Elías Rafn Ólafsson er aðalmarkvörður liðsins.
Í sumar hafði Stuttgart verulegan áhuga á að fá Campbell sem hafði náð samkomulagi við Stuttgart um fimm ára samning, en Dortmund breytti afstöðu sinni varðandi Cole og sleit því viðræðunum.
Cole, sem gekk í raðir Dortmund frá Breiðabliki árið 2022, var einnig á mála hjá FH hér á landi. Hann spilaði með yngri landsliðum Íslands áður en hann ákvað að velja það að spila með Bandaríkjunum. Faðir Cole er bandarískur en móðir hans íslensk.
Sóknarmaðurinn hefur spilað 11 leiki með U19 og U20 ára landsliðum Bandaríkjanna og skorað fimm mörk.
Athugasemdir
