Gabriel Jesus, framherji Arsenal á Englandi, er að snúa aftur á völlinn eftir erfið meiðsli en hann lék æfingaleik fyrir luktum dyrum í vikunni.
Jesus hefur verið frá síðan í byrjun ársins er hann fór meiddur af velli í bikarleik gegn Manchester United.
Mikel Arteta, stjóri Arsenal, sagðist vera með eftirsjá að hafa flýtt sér að nota Jesus á þeim tímapunkti, en Arsenal var fáliðið í sóknarleiknum vegna meiðsla Bukayo Saka og Kai Havertz á þeim tíma og því ekki margir möguleikar í boði fyrir spænska stjórann.
Arteta sagði á miðvikudag að Jesus væri að nálgast endurkomu og staðfesti síðan við fjölmiðla í gær að hann hafi spilað æfingaleik fyrir luktum dyrum.
„Gabi spilaði þann leik og Ethan sömuleiðis því hann vildi fá fleiri mínútur. Við nýttum tækifærið þar sem þeir vildu fá að spreyta sig aðeins í leik og það heppnaðist mjög vel," sagði Arteta í gær.
Mjög jákvæðar fréttir úr herbúðum Arsenal sem er að endurheimta marga úr meiðslum fyrir desembertörnina, en Martin Ödegaard sneri aftur í hópinn á dögunum og þá eru þeir Kai Havertz og Viktor Gyökeres að verða klárir í slaginn.
Athugasemdir
