Spænski sóknarmaðurinn Carles Perez lenti í heldur óskemmtilegu atviki er hann var í gönguferð með hund sinn í grísku borginni Thessaloniki í dag.
Perez, sem er á láni hjá gríska félaginu Aris frá Celta Vigo, var á röltinu með hund sinn er annar hundur réðst á hund Perez sem varð til þess að spænski leikmaðurinn þurfti að skerast inn í leikinn.
Samkvæmt grískum miðlum beit árásarhundurinn Perez í kynfærin og leitaði leikmaðurinn sér strax hjálpar á spítala til þess að hlúa að sárunum.
Hann var útskrifaður stuttu síðar með nokkra skurði og verður fylgst áfram með líðan hans næstu daga.
Ömurleg byrjun á dvöl hans í Grikklandi en hann flutti til landsins fyrir aðeins þremur vikum. Hann kom upp í gegnum akademíu Barcelona og spilaði 13 leiki með aðalliðinu.
Einnig lék hann með Roma á Ítalíu og var þá á láni hjá Getafe á síðustu leiktíð.
Athugasemdir
