Parma og Torino áttust við í síðasta leik helgarinnar í ítalska boltanum og úr varð mikil skemmtun.

Gervinho hefur verið meðal bestu manna Parma frá komu sinni til félagsins og lagði hann fyrsta mark leiksins upp í kvöld. Hann slapp innfyrir vörnina og renndi boltanum á Dejan Kulusevski sem skoraði auðvelt mark.

Tíu mínútum síðar var Cristian Ansaldi búinn að jafna fyrir gestina og ekki leið á löngu þar til varnarmaðurinn Bremer gerðist brotlegur innan vítateigs.

Bremer fékk sitt seinna gula spjald og var rekinn af velli og steig Gervinho á punktinn. Hann lét Salvatore Sirigu verja frá sér og staðan því enn jöfn en heimamenn manni fleiri.

Andrea Belotti kom tíu leikmönnum Torino yfir rétt fyrir leikhlé en Daninn stóri Andreas Cornelius jafnaði og staðan 2-2 í hálfleik.

Heimamenn voru við stjórn í síðari hálfleik og náði Roberto Inglese, sem kom inn af bekknum eftir skelfilega frammistöðu í síðustu umferð, að pota inn sigurmarki á 88. mínútu.

Liðin eru jöfn með níu stig eftir sex umferðir.