Það verður að öllum líkindum að minnsta kosti ein breyting frá hópnum sem var valinn fyrir síðustu leiki. Willum Þór Willumsson er að glíma við meiðsli og verður ekki klár fyrir leikina.

Landsliðsfyrirliðinn Orri Steinn Óskarsson er ekki heldur byrjaður að spila, en hann sagði við Fótbolta.net fyrr í þessum mánuði að hann vonaðist eftir því að vera farinn af stað fyrir komandi landsleiki. Það verður fróðlegt að sjá hvort hann verði í hópnum á morgun. Brynjólfur Andersen Willumsson var kallaður inn vegna meiðsla Orra í síðasta verkefni en Brynjólfur er sjálfur að glíma við meiðsli.

Það eru góðar fréttir af Aroni Einari Gunnarssyni sem missti af síðustu leikjum, hann gæti komið inn í hópinn, en hann var valinn í upprunalegan hóp fyrir síðustu leiki en gat ekki tekið þátt. Hjörtur Hermannsson var kallaður inn fyrir Aron í síðasta verkefni.

Þá er Jóhann Berg Guðmundsson einnig kominn á fullt eftir að hafa rétt misst af síðustu landsleikjum. Albert Guðmundsson meiddist gegn Aserbaísjan en hann var mættur aftur á völlinn með Fiorentina um helgina og ætti að vera klár í landsleikina.

Stuðningsmenn Köln höfðu áhyggjur af því að Ísak Bergmann Jóhannesson hefði farið meiddur af velli um helgina en meiðsli hans eru mjög smávægileg og hann verður klár í landsleikina.

Sverrir Ingi Ingason er byrjaður að spila reglulega með Panathinaikos eftir að hafa verið á bekknum í upphafi tímabils og Daníel Leó Grétarsson sneri aftur á völlinn um helgina eftir að hafa misst af tveimur leikjum þar á undan. Jón Dagur Þorsteinsson lék þá allan leikinn með Hertha Berling gegn Nurnberg um liðna helgi eftir að hafa ekki séð völlinn í leikjunum tveimur þar á undan.

Það er hins vegar áframhald á því að Þórir Jóhann Helgason fær lítið að spila með liði sínu Lecce á Ítalíu. Spilaði hálfleik í bikarnum gegn AC Milan en hefur ekkert spilað í deildinni frá síðustu landsleikjum. Þórir kom nokkuð vel inn í leikinn gegn Frökkum og er líklegt að hann verði áfram í hópnum.

Það má telja líklegt að Aron Einar snúi aftur, mögulega á kostnað Hjartar, Jóhann Berg kemur líklega inn fyrir Willum og svo er óljóst hvort Orri Steinn sé klár, og þá hver kæmi inn fyrir hann. Er Brynjólfur klár? Er kominn tími á Stefán Inga Sigurðarson? Þá gæti Arnór Ingvi Traustason einnig snúið aftur ef Arnar vill frekar að Gísli Gottskálk Þórðarson spili með U21 árs landsliðinu - eða þá að Kolbeinn Þórðarson fái kallið. Annað virðist vera nokkuð borðleggjandi, en það mun svo allt koma í ljós þegar landsliðshópur Arnars verður opinberaður á morgun.

Líklegur hópur
Elías Rafn Ólafsson - FC Midtjylland
Hákon Rafn Valdimarsson - Brentford
Anton Ari Einarsson - Breiðablik

Logi Tómasson - Samsunspor
Mikael Egill Ellertsson - Genoa CFC
Daníel Leó Grétarsson - SonderjyskE
Aron Einar Gunnarsson - Al-Gharafa SC
Sverrir Ingi Ingason - Panathinaikos F. C.
Guðlaugur Victor Pálsson - AC Horsens
Bjarki Steinn Bjarkason - Venezia FC
Gísli Gottskálk Þórðarson - Lech Poznan
Ísak Bergmann Jóhannesson - 1. FC Köln
Þórir Jóhann Helgason - U. S. Lecce
Stefán Teitur Þórðarson - Preston North End F.C.
Hákon Arnar Haraldsson - LOSC Lille
Albert Guðmundsson - ACF Fiorentina
Kristian Nökkvi Hlynsson - FC Twente
Jóhann Berg Guðmundsson - Al Dhafra
Jón Dagur Þorsteinsson - Hertha BSC
Mikael Neville Anderson - Djurgården
Sævar Atli Magnússon - Brann
Andri Lucas Guðjohnsen - Blackburn
Orri Steinn Óskarsson - Real Sociedad
Daníel Tristan Guðjohnsen - Malmö FF