Ruben Amorim þjálfari Manchester United var kátur eftir endurkomusigur gegn Crystal Palace í ensku úrvalsdeildinni í dag.
Man Utd lenti undir í fyrri hálfleik en tókst að snúa stöðunni við með tveimur mörkum eftir aukaspyrnur í síðari hálfleiknum. Amorim talaði um þreytu leikmanna Palace eftir að þeir töpuðu fyrir Strasbourg í Sambandsdeildinni í miðri viku.
„Það voru smáatriðin sem skópu sigurinn. Undir lok fyrri hálfleiks sáum við að leikmenn Palace voru að þreytast og við nýttum okkur það. Við stjórnuðum leiknum mjög vel eftir að hafa tekið forystuna en fyrri hálfleikurinn var ekki nægilega góður," sagði Amorim sem var svo spurður hvernig þeir hafi nýtt sér þreytu Palace.
„Bara með hlaupunum, sérstaklega hjá Joshua Zirkzee og hvernig hann tengdi liðið saman í seinni hálfleiknum. Hann var frábær og við vitum hvernig þetta er með þreytuna þegar það er leikur í miðri viku eins og var hjá okkur á síðustu leiktíð. Það er mikilvægt fyrir framherja að skora mörk en ég er mjög ánægður með vinnuna sem Joshua leggur á sig fyrir liðsfélagana. Þetta er gott fyrir sjálfstraustið."
Man Utd fer upp í sjötta sæti deildarinnar með þessum sigri, með 21 stig eftir 13 umferðir.
„Við erum bara að hugsa um að spila betri fótbolta, ekkert annað. Við eigum enn langt í land til að komast á þann stað sem við viljum vera á."
Athugasemdir
