FCK heimsótti topplið AGF til Árósa og var Viktor Bjarki fyrsta skipting Jacob Neestrup þjálfara. Staðan var 1-0 fyrir AGF þegar Viktor kom inn af bekknum en lokatölur urðu 2-0.

AGF er með 37 stig eftir 17 umferðir, níu stigum meira heldur en FCK sem situr í fjórða sæti.

Elías Rafn Ólafsson hélt þá hreinu í stórsigri Midtjylland gegn Nordsjælland, þar sem lokatölur urðu 6-0 og var marki heimamanna aldrei ógnað. Elías hafði lítið að gera og er Midtjylland í harðri toppbaráttu, tveimur stigum á eftir toppliði AGF.

Í næstefstu deild í Danmörku mættust Guðlaugur Victor Pálsson og Nóel Atli Arnórsson í markalausu jafntefli hjá Horsens gegn Álaborg, sem eru í efri hlutanum að berjast um sæti í efstu deild.

Jóhannes Kristinn Bjarnason kom þá inn af bekknum í 1-1 jafntefli hjá Kolding gegn Aarhus Fremad í sömu deild. Þar er Kolding í baráttu um sæti í umspilinu fyrir sæti í efstu deild, sex stigum fyrir ofan Aarhus.

Í norska boltanum komu Davíð Snær Jóhannesson og Ólafur Guðmundsson inn af bekknum er Álasund vann umspil næstefstu deildar eftir ótrúlega spennandi slag.

Álasund mætti Kongsvinger og skiptust liðin á að skora í ótrúlega skemmtilegum slag. Staðan var 4-4 eftir venjulegan leiktíma svo grípa þurfti til framlengingar, þar sem Álasund hafði betur.

Álasund vann þar með umspil næstefstu deildar og mætir Bryne í úrslitaleikjum um sæti í efstu deild. Bryne endaði í þriðja neðsta sæti í Eliteserien.

Kjartan Már Kjartansson var ónotaður varamaður í sigri Aberdeen í skosku deildinni alveg eins og Kolbeinn Birgir Finnsson í jafnteflisleik hjá FC Utrecht í Hollandi.

Valgeir Lunddal Friðriksson var ekki með í tapi Düsseldorf vegna meiðsla og var Hólmbert Aron Friðjónsson að lokum ónotaður varamaður í naumum sigri Gwangju í Suður-Kóreu.

AGF 2 - 0 FCK

Midtjylland 6 - 0 Nordsjælland

Horsens 0 - 0 AaB

Kolding 1 - 1 Aarhus Fremad

Kongsvinger 4 - 5 Álasund

Livingston 0 - 1 Aberdeen

G.A. Eagles 2 - 2 Utrecht

Dynamo Dresedn 2 - 1 Dusseldorf

Suwon 0 - 1 Gwangju