Fótbolti.net

þri 30. desember 2025 23:36

Ívan Guðjón Baldursson

Emery tók ekki í höndina á Arteta

Mynd: EPA

Unai Emery þjálfari Aston Villa var svekktur eftir 4-1 tap gegn Arsenal í titilbaráttu enska boltans í kvöld. Emery var fljótur að æða í búningsklefann eftir lokaflautið og tók ekki í höndina á samlanda sínum Mikel Arteta, þjálfara Arsenal.

Staðan var markalaus eftir fyrri hálfleik en heimamenn í liði Arsenal nýttu færin sín til að rúlla yfir Aston Villa í síðari hálfleiknum. Miðjan hjá Villa hrundi eftir að Amadou Onana fór meiddur af velli í leikhlé. John McGinn kom inn í hans stað en hann er allt önnur tegund af leikmanni.

„Við vorum stórkostlegir í fyrri hálfleik, við spiluðum hann betur heldur en í sigrinum gegn Chelsea um helgina. Vandamálið er að við misstum dampinn í seinni hálfleik, við eigum erfitt með að spila vel í 90 mínútur. Okkur leið vel eftir fyrri hálfleikinn en það var skellur að missa Amadou (Onana) af velli, það breytti öllu," sagði Emery. „Við þurfum einn af þessum þremur (Boubacar Kamara, Ross Barkley, Amadou Onana) á miðjuna hjá okkur til að gefa orku og styrkleika, en þeir eru allir fjarverandi. Miðjan gjörsamlega hrundi eftir að Amadou fór útaf.

„Ég er ánægður með hugarfarið, strákarnir gáfust aldrei upp og voru ennþá að skapa sér færi þó við værum fjórum mörkum undir. Við lærum af þessu tapi. Þetta er dýrmætt fyrir reynslubankann hjá strákunum, sérstaklega þessum yngstu sem fengu að spreyta sig undir lokin."

Emery var að lokum spurður hvers vegna hann rauk af velli án þess að kveðja Arteta eftir lokaflautið.

„Ég beið aðeins eftir honum en hann var upptekinn með þjálfarateyminu sínu. Rútínan mín er að fara beint til þjálfara andstæðinganna til að takast í hendur og svo fer ég beint í búningsklefann. Ef hann (þjálfari andstæðinganna) fylgir ekki sömu reglu þá get ég ekki verið að bíða eftir honum. Ég veit ekki hvað gerðist.

„Þetta er ekki vandamál fyrir mig en ég bara gat ekki beðið eftir honum. Það er kalt úti. Ég er ánægður þrátt fyrir þetta tap og vil óska Arsenal til hamingju."

Emery nefndi einnig að fyrir nokkrum árum hefði opnunarmark Arsenal ekki verið gilt vegna brots á markverði og ræddi þar að auki um magnaða sigurgöngu Aston Villa sem lauk með þessu tapi. Villa hafði unnið 11 leiki í röð í öllum keppnum áður en liðið heimsótti Emirates.

		L	U	J	T	ms:	mf:	mun	Stig
1	Arsenal	31	21	7	3	61	22	+39	70
2	Man City	30	18	7	5	60	28	+32	61
3	Man Utd	31	15	10	6	56	43	+13	55
4	Aston Villa	31	16	6	9	42	37	+5	54
5	Liverpool	31	14	7	10	50	42	+8	49
6	Chelsea	31	13	9	9	53	38	+15	48
7	Brentford	31	13	7	11	46	42	+4	46
8	Everton	31	13	7	11	37	35	+2	46
9	Fulham	31	13	5	13	43	44	-1	44
10	Brighton	31	11	10	10	41	37	+4	43
11	Sunderland	31	11	10	10	32	36	-4	43
12	Newcastle	31	12	6	13	44	45	-1	42
13	Bournemouth	31	9	15	7	46	48	-2	42
14	Crystal Palace	30	10	9	11	33	35	-2	39
15	Leeds	31	7	12	12	37	48	-11	33
16	Nott. Forest	31	8	8	15	31	43	-12	32
17	Tottenham	31	7	9	15	40	50	-10	30
18	West Ham	31	7	8	16	36	57	-21	29
19	Burnley	31	4	8	19	33	61	-28	20
20	Wolves	31	3	8	20	24	54	-30	17