„Þetta er stórhættulegur leikur og endar bara á einn veg. Lið sem fær á sig 22 mörk í 9 leikjum og heldur svona áfram fer niður. Þeir gætu orðið skemmtilegasta lið sem hefur fallið," segir Tómas Þór Þórðarson.

Í þættinum er rætt um að ráðningin á Ragnari Sigurðssyni sem aðstoðarþjálfara hafi ekki skilað því sem vonast var eftir. Ragnar er einn besti varnarmaður í sögu íslenska landsliðsins en hefur ekki náð að aðstoða í að binda saman varnarleik Fram.

Í hlaðvarpsþættinum Mín skoðun með Valtý Birni er einnig rætt um innkomu Ragnars í teymið.

„Liðið virðist ekki læra. Það má gagnrýna helling í fari Framara núna og þeir verða að átta sig á því að þetta er að fara illa fyrir þá. Það væri gaman að sjá Framara þétta sig, ég sé enga breytingu á Framliðinu milli ára þrátt fyrir að hafa tekið inn Ragnar Sigurðsson sem aðstoðarþjálfara. Mér finnst liðið slakara ef eitthvað er," segir Kristinn Hjartarson, álitsgjafi þáttarins.

„Mér finnst það líka. Það er ekkert lið sem hefur fengið á sig eins mörg mörk," segir Valtýr Björn Valtýsson.

„Við þurfum klárlega að bæta úr varnarleiknum. Því að það er alltaf erfitt að ná árangri þegar þú þarft að skora mörg mörk." sagði Jón Sveinsson, þjálfari Fram, eftir tapið á Akureyri.