Spilandi aðstoðarþjálfari Hauka, Sigurbjörn Örn Hreiðarsson þurfti að horfa upp á Þróttara jafna metin í uppbótartíma gegn Hauka í kvöld, en Sigurbjörn fór af velli í fyrri hálfleik vegna meiðsla.
Lestu um leikinn: Þróttur R. 1 - 1 Haukar
,,Það var mjög svekkjandi að fá á sig þetta jöfnunarmark á 90.mínútu, vegna þess að við vorum búnir að halda þessu í núllinu," sagði Sigurbjörn. Hann telur að jafnteflið í kvöld hafi verið sanngjörn úrslit,
,,Þegar upp er staðið er þetta kannski sanngjörn úrslit. Við áttum líklega ekki meira skilið í dag. Við vorum ekki nógu beittir í þessum leik, við vorum því miður hálf tæpir, vorum ekki eins og við eigum að vera, það er alveg á hreinu."
,,Þróttarar eru hinsvegar ágætir og það má ekkert taka það af þeim. Það er erfitt að eiga við þá, þegar þeir eru í góðum gír og mér fannst þeir vera í flottum gír í kvöld," sagði Sigurbjörn Hreiðarsson sem var sammála því að það hljóti að vera jákvætt að vera samt sem áður yfir í 90.mínútur þrátt fyrir að liðið hafi ekki átt sinn besta dag.
Sigurbjörn fór útaf í fyrri hálfleik vegna meiðsla og þar með stækkaði meiðslalisti Hauka sem er orðinn heldur stór,
,,Ég fékk eitthvað tak í kálfann, ég er búinn að vera aðeins tæpur í kálfanum og ég gat eiginlega ekkert haldið áfram. Maður er bara að verða of gamall í þetta. Það er ljóst að aldurinn er farinn að segja til sín, allavegana í dag," sagði Sigurbjörn sem fór síðan aðeins yfir byrjunina á mótinu hjá Haukum sem og yfir meiðslalistann hjá Haukum.
Viðtalið í heild sinni við Sigurbjörn er hægt að sjá í sjónvarpinu hér að ofan.
