Arnór er samningsbundinn CSKA til 2024 en í mars setti FIFA upp sérstakan glugga fyrir erlenda leikmenn sem eru samningsbundnir rússneskum og úkraínskum félögum.

Þeir máttu losa sig tímabundið undan samningi og finna sér nýtt félag til 30. júní. FIFA framlengdi svo úrræðið og gildir það í ár til viðbótar.

Arnór var á láni hjá Venezia í Seríu A á síðustu leiktíð en átti að snúa aftur til rússneska félagsins núna um mánaðamótin. Það verður ekkert af því, þar sem Arnór hefur ákveðið að nýta sér úrræði FIFA og yfirgefa félagið tímabundið.

Sænska félagið Norrköping hefur áhuga á að fá Arnór en hann þekkir vel til þar. Hann lék með liðinu frá 2017 til 2018 áður en Norrköping seldi hann fyrir metfé til CSKA.