Halldóra Birta Sigfúsdóttir, leikmaður Fjarðabyggðar/Hattar/Leiknis F. í Lengjudeild kvenna, er ósátt með þann staðal af dómgæslu sem er við lýði í deildinni.
Í dag töpuðu Austfirðingar heimaleik gegn HK og ákvað Halldóra að gagnrýna dómgæsluna harkalega að leikslokum.
Hún birti mynd með texta í 'story' á Instagram þar sem hún lét allt flakka varðandi dómgæsluna sem hún hefur þurft að upplifa í Lengjudeildinni.
„Standardinn í dómaramálum í 1. deild kvenna er til skammar," skrifaði Halldóra yfir mynd þar sem HK virðist skora rangstöðumark í dag.
„Við fyrir austan fáum alltaf sömu dómara sem eru ekki í neinu formi og geta hvorki hlaupið útfyrir miðjuhringinn né verið í línu við varnarlínu liðanna.
„Hér dæma þeir t.d. mark og aðaldómarinn er hvergi sjáanlegur og ekki í neinni stöðu til þess að sjá hvað er að gerast. Aðstoðardómarinn var ekki í línu við varnarmenn og sér þetta þar af leiðandi ekki heldur."