Brooks fór í hjartastopp þegar um það bil ellefu mínútur voru búnar af leiknum í gær. Stuðningsmenn kölluðu til spænska leikmannsins Marcos Alonso og báðu hann um að koma skilaboðum áleiðis til dómarans og bráðaliða.

David Coote, dómari leiksins, stöðvaði leikinn og gengu leikmenn til búningsherbergja á meðan bráðaliðar huguðu að Brooks. Leikurinn var stopp í hálftíma áður en hann fór aftur af stað.

Endurlífgunartilraunir báru árangur og var Brooks fluttur á spítala í nágrenninu en líðan hans er góð og er hann á batavegi.

Watford hefur ákveðið að bjóða honum og eiginkonu hans á heimaleik þegar hann hefur náð sér að fullu.