Zlatan Ibrahimovic, framherji AC Milan, segir að það séu engin vandræði á milli hans og Romelu Lukaku.
Þessum fyrrum samherjum lenti saman í leik Inter og AC Milan í ítalska bikarnum á dögunum. Þeir hnakkrifust og þurftu menn að draga Lukaku í burtu frá Svíanum.
Ibrahimovic talaði um þáttöku sína á Sanremo tónlistarhátíðinni í þessari viku og var spurður út í það, hvað myndi gerast ef þáttastjórnandinn Amadeus, sem er aðdáandi Inter, myndi bjóða Lukaku að koma með á hátíðina.
„Ef hann vill koma, þá er hann velkominn. Það sem gerist á vellinum verður eftir þar. Það eru engin vandræði," sagði Zlatan.
Zlatan og Sinisa Mihaljovic, þjálfari Bologna, munu syngja lag saman á hátíðinni. Zlatan vonast eftir því að Serbinn kunni ekkert að syngja.
„Vonandi kann hann ekkert að syngja, þá verðum við allavega á sömu blaðsíðunni þarna."
Athugasemdir