Grindavík tilkynnti á aðventukvöldi í gær að Lýsi muni snúa aftur á búninga félagsins á næstu leiktíð.
Það þykir almennt ekki til tíðinda þegar merki fyrirtækis birtist framan á búningum félags en saga Grindavíkur og Lýsis er áratugalöng og farsæl.
Lýsi var síðast á búningum Grindavíkur sumarið 2016 en hætti eftir það tímabil. Þá hafði fyrirtækið verið þar í 33 ár eða frá árinu 1984.
Á þeim tíma sagði Jónas Þórhallsson þáverandi formaður knattspyrnudeildar félagsins að um einn lengsta slíkan samning í heiminum hafi verið að ræða.
Sá eini sem hafði verið lengur er Philips auglýsing á búningum PSV Eindhoven frá 1982-2016. Nú gefst Lýsi kostur á að slá það met.
Við sama tilefni var tilkynnt að völlur Grindvíkinga muni heita Stakkavíkurvöllurinn en Stakkavík á í samstarfi við Lýsi með að útvega hráefni.
