England í dag - City og United berjast um Manchester

Marco Silva var rekinn eftir 5-2 tap gegn Liverpool í miðri viku og mun Duncan Ferguson stýra Everton í dag.

Chelsea hefur verið að gera fína hluti á tímabilinu undir stjórn Frank Lampard og situr í fjórða sæti sem stendur, þremur stigum eftir Manchester City og sex eftir Leicester.

Topplið Liverpool, sem er með átta stiga forystu, heimsækir Bournemouth sem er búið að tapa fjórum í röð í deildinni. Joel Matip og Nathaniel Clyne eru meiddir í herbúðum gestanna en heimamenn eru án níu leikmanna.

Tottenham fær þá Burnley í heimsókn og afar ólíklegt er að Jóhann Berg Guðmundsson verði í hóp gestanna vegna meiðsla. Á sama tíma á botnlið Watford, sem réði Nigel Pearson sem stjóra í gær, leik við Crystal Palace. Pearson verður þó uppi í stúku.

Lokaleikur dagsins er risaslagur þar sem Man City og Man Utd mætast í grannaslag. Ellefu stig skilja liðin að í efri hluta deildarinnar en Rauðu djöflarnir hafa verið seigir gegn stórliðunum hingað til á leiktíðinni. Sigur í dag myndi þó hjálpa Liverpool í titilbaráttunni.

Leikir dagsins:
12:30 Everton - Chelsea (Síminn Sport)
15:00 Bournemouth - Liverpool (Sjónvarp Símans)
15:00 Tottenham - Burnley
15:00 Watford - Crystal Palace
17:30 Man City - Man Utd (Síminn Sport)