Lazio fór óvenjulega leið í að staðfesta að Maurizio Sarri væri nýr stjóri liðsins. Birt var tjákn á Twitter sem er mynd af sígarettu en Sarri er þekktur keðjureykingamaður.

Þegar hann stýrði Chelsea var hann oft að naga sígarettur við hliðarlínuna því bannað var að reykja við völlinn.

Sarri, sem er einnig fyrrum stjóri Napoli og Juventus, hefur gert tveggja ára samning við Lazio.

Hann vann sinn fyrsta titil á stjóraferlinum þegar hann gerði Chelsea að Evrópudeildarmeisturum og fylgdi því svo eftir með Ítalíumeistaratitli með Juventus ári síðar.