Halldór Jón Sigurðsson, betur þekktur sem Donni, svaraði spurningum eftir tap Tindastóls gegn ÍBV í 8-liða úrslitum Mjólkurbikars kvenna í dag.
Lestu um leikinn: Tindastóll 1 - 3 ÍBV
Tindastóll leikur í Bestu deild kvenna en tapaði óvænt gegn Eyjakonum sem leika í Lengjudeildinni. Donni er verulega svekktur með tapið, sérstaklega útaf öllum þeim stuðningi sem hans konur fengu frá áhorfendum.
„Ég er bara gráti næst. Þetta er ótrúlega svekkjandi sérstaklega í ljósi þess að við fengum frábæra mætingu á völlinn. Þetta var geggjað fallegur dagur og flottur stuðningur úr stúkunni. Að geta ekki unnið fyrir fólkið er bara ótrúlega svekkjandi," sagði Halldór beint eftir lokaflautið í dag.
Hvernig stendur á því að Tindastóll hafi ekki spilað nægilega vel í dag eftir að hafa skilað inn frábærri frammistöðu gegn Val rétt fyrir helgi?
„Allir leikir hafa sitt eigið líf, það er ekki hægt að bera saman leik gegn Val við leik gegn ÍBV eða einhverju öðru liði. Hver einn og einasti leikur er einstakur og þetta er því ósambærilegt.
„Í dag náðum við einhvern veginn aldrei flugi og mér fannst ÍBV ógeðslega góðar og þær eiga þennan sigur svo sannarlega skilið."
Tindastóll heimsækir sterkt lið FH í næstu umferð Bestu deildarinnar og býst Donni ekki við að það verði vandamál að koma leikmönnum sínum í gírinn fyrir þá viðureign.
„Við höfum viku til að undirbúa okkur fyrir næsta leik en við höfðum bara tvo daga fyrir þennan leik í dag. Við þurfum á þessari hvíld að halda, aðeins að safna kröftum og gíra okkur í næsta leik."
Athugasemdir
