Í lokaumferð Bestu deildar karla tók Víkingur á móti Val á Víkingsvelli í leik sem endaði með sannfærandi heimasigri. Heimamenn sýndu styrk sinn frá fyrstu mínútu, stjórnuðu leiknum af öryggi og tryggðu sér verðskuldaðan 2-0 sigur. Þegar flautað var til leiksloka brutust út fagnaðarlæti á meðal leikmanna og stuðningsmanna en þeir lyftu titlinum í lok leiks.
„Nei, mér fannst líka bara orkustigið okkar miklu meira en hjá Val. Það sýnir sig bara í þessum tveimur leikjum gegn Breiðablik og Val, þar sem við erum búnir að tryggja okkur titilinn en við erum samt sem áður með meiri orku og það er meira hungur, til þess að vinna þessa leiki. Það sýnir bara sigurhugarfarið í þessum klúbbi og hóp.”
Lestu um leikinn: Víkingur R. 2 - 0 Valur
Víkingur kom sér í efri hluta Bestu deildarinnar og unnu alla leiki sem hægt var að vinna. Þrátt fyrir að ekkert hafi verið undir seinustu tvo leikina, kláruðu þeir samt verkefni sín fagmannlega og var Sölvi Geir sáttur við það.
„Virkilega vel gert að fara í efri hlutann í skiptinguna og vinna alla leikina, þannig að það sýnir bara styrk okkar. Við settum okkur viss markmið og við litum aldrei af þeim og náðum þeim. Það er alltaf sætt þegar það gerist."
Matthías Vilhjálmsson og Pablo Punyed spiluðu kveðjuleiki í dag en Matthías er að leggja skóna á hilluna. Hins vegar hefur Pablo Punyed verið orðaður við stöðu spilandi aðstoðarþjálfara Hauka og því spennandi að fylgjast með því hvað hann tekur sér fyrir hendur. Hafa þessir tveir heldur betur sett mark sitt á félagið og unnið titla í treyju Víkings. Sölvi hrósaði þeim í hástert.
„Ómetanlega. Pablo kemur hérna fyrst 2021 og vinnur strax tvöfalt. Hann vinnur einhverja sex titla á fimm árum hérna, sömuleiðis Matti og kemur inn og hjálpa þessum klúbbi að komast á þennan stað sem hann er á í dag. Þetta eru algjörir sigurvegarar og hafa unnið yfir 30 titla á milli sín, þannig að þetta er ómetanlegt að fá svona sigurvegara inn í klúbbinn. Það verður eftirsjá af þessum herramönnum.”
Aron Elís Þrándarson, lykilmaður Víkings, meiddist illa í fyrsta deildarleik tímabilsins en hann sneri aftur á völlinn í kvöld eftir ansi langa fjarveru.
„Það vildi svo óheppilega til og leiðinlegt að meiðast í fyrsta leik en það var eitthvað fallegt við það að hann skyldi loka mótinu líka fyrir,” sagði Sölvi að lokum.
