Tíu leikmenn Grindavíkur unnu stórkostlegan 2-1 endurkomusigur á HK í Lengjudeildinni á Stakkavíkurvelli í dag.

Arnþór Ari Atlason skoraði fyrir HK á 34. mínútu er boltinn datt fyrir hann í teignum og skoraði hann með þrumuskoti upp í marknetið.

Hann var ekki langt frá því að tvöfalda forystu HK-inga nokkrum mínútum síðar. Eftir gott samspil HK-inga slapp Arnþór í gegn, en honum brást bogalistin og setti boltann rétt framhjá markinu.

HK-ingar voru líklegri en Grindvíkingar framan af í síðari hálfleknum og var Dagur Orri Garðarsson nálægt því að bæta við öðru er hann pressaði Matias Niemala, markvörð Grindavíkur, og komst í boltann sem fór rétt framhjá markinu.

Tuttugu mínútum fyrir leikslok fékk Adam Árni Róbertsson, leikmaður Grindavíkur, sitt annað gula spjald og þar með rautt fyrir glórulausa tæklingu á Ólafi Erni Ásgeirssyni, markverði HK-inga og virtist á þeim tímapunkti nánast útilokað að fá eitthvað úr þessum leik.

Grindvíkingar lögðu hins vegar ekki árar í bát og sóttu jöfnunarmark á 83. mínútu eftir stórkostlegt einstaklingsframtak Ármanns Inga Finnbogasonar sem lék á mann og annan áður en hann kom boltanum á Sindra Þór Guðmundsson sem gat ekki annað en potað boltanum yfir línuna.

Ármann Ingi var allt í öllu í sóknarleiknum og þegar þrjár mínútur voru eftir af venjulegum leiktíma kom sigurmarkið er Ármann setti hornspyrnu af hægri væng inn á teiginn á Dennis Moreno sem skoraði með flottum skalla.

Ævintýralegur endurkomusigur hjá Grindvíkingum sem eru komnir með 10 stig og fara upp í 4. sæti deildarinnar, en HK í 3. sæti með 11 stig.