Haraldur Árni Hróðmarsson, þjálfari Grindavíkur, gat ekki leynt gleði sinni eftir fyrsta sigur liðsins á heimavelli í Grindavík, í tæplega tvö ár.
„Þetta er stærra en fólk gerir sér almennt grein fyrir. Fólkið hér vill fá tækifæri til að hittast, fólkið hér vill byggja upp bæinn hérna. Bara að eitthvað sé að gerast hérna skiptir máli og mætingin hefur verið frábær. Fólkið okkar kemur hingað, bæði þau sem hafa áhuga á fótbolta og ekki, bara til að hittast og sjá aðra. Það er ofboðslega gaman eftir tvo heimaleiki í röð án sigurs að ná í þrjú stig og reyna þá að hamra áfram á það járn, að rosalega gaman sé að mæta á heimavöllinn okkar,“ sagði Haraldur í viðtali við Fotbolti.net eftir leik.
Grindavík var bæði manni og marki undir en náði á einhvern ótrúlegan hátt að snúa leiknum sér í vil.
„Mér fannst við góðir í þessum leik. HK-ingar áttu örugglega fleiri og lengri góða kafla en mér fannst við standa vel og vera hættulegir. Að lenda 1-0 og einum manni undir er erfitt en við náum að snúa því. Það sýnir liðsheild,“ svaraði Haraldur aðspurður út í viðbrögð sín af leiknum.
Gleðin hjá Grindvíkingum í leikslok var ósvikin og mikið fagnað. Haraldur var glaður að geta skilað þremur stigum á heimavelli eftir allt sem hefur gengið á undanfarið.
„Við höfum lent í öllum andskotanum. Það hafa alltaf verið marka leikir hjá okkur og ég hef ekki haft áhyggjur af því að við náum ekki að skora. Það var erfitt í dag því að HK vörnin er djöfull sterk, ekki spurning,“ sagði Haraldur að lokum en viðtalið við hann í heild má sjá í spilaranum hér að ofan.
