Hermann Hreiðarsson, þjálfari HK, var ekki sáttur eftir 2-1 tap gegn Grindavík í Lengjudeildinni í dag. HK-ingar voru marki yfir og manni fleiri þegar tíu mínútur voru eftir af leiknum.
„Við erum með leikinn í höndum okkar höndum. Við brennum á dauðafærum, tvisvar þar sem við erum komnir einn í gegn og svo erum við 1-0 yfir og manni fleiri. Það er ekki hægt að sakast við neinn nema sjálfa okkur,“ sagði Hermann vonsvikin í viðtali við Fotbolti.net eftir leik.
„Við verðum að einfalda leikinn, hjálpa hvorum öðrum og spila á réttum stöðum og vera ekki að gefa frá okkur aukaspyrnur á röngum stöðum. Nota aðeins hausinn betur og vera yfirvegaðri. Svo var það fyrsta snertingin, ég veit það ekki. Hvert einasta snerting var bara.. ég veit það ekki,“ bætti Hermann við.
Þrátt fyrir að HK-ingar hafi kastað leiknum frá sér þá gat Hermann einnig dregið fram jákvæða punkta úr frammistöðu sinna manna.
„Við vorum með góða stjórn á leiknum. Ég held að Óli [Örn Ásgeirsson, markvörður HK] þurfti ekki að verja skot fyrr en við fáum á okkur mark á 70. mínútu og erum þá manni fleiri. Það er jákvætt, að stjórna leik frá A-Ö. Þeir [Grindvíkingar] hafa verið að skora svolítið af mörkum og við stoppuðum eiginlega allar þeirra aðgerðir en okkur tókst ekki að refsa til að klára leikinn,“ sagði Hermann Hreiðarsson. Viðtalið við hann í heild má sjá í spilaranum hér að ofan.
