Valur tók á móti slóvensku meisturunum, Maribor, í fyrri viðureign liðanna í forkeppni Meistaradeildarinnar. Þetta er 1. umferð forkeppninnar.

Leikurinn var í jafnvægi í fyrri hálfleik og litu Valsmenn vel út. Fyrsta höggið kom á 42. mínútu. Spiro Pericic skoraði þá með skalla eftir aukaspyrnu utan af kanti. Frekar súr staða í hálfleik miðað við frammistöðu liðanna.

Á 52. mínútu kom risaatvik. Óli Kalli skallaði boltann eftir hornspyrnu og fór boltinn í gegnum klofið á markmanni Maribor. Valsmenn fögnuðu og báðu um mark en dómarinn sagði nei og leikurinn hélt áfram.

pic.twitter.com/HEJugO8FMi

— Tómas Þór Þórðarson (@tomthordarson) July 10, 2019

Valsmenn fengu svo annað högg eftir klukkutíma leik. Rok Kronaveter, sem átti afbragðsleik, óð upp vinstri vænginn og lagði boltann út í teiginn þar sem Dino Hotic fékk hann og klíndi boltann í fjærhornið.

Maribor stýrði leiknum að mestu leyti eftir annað markið og á 85. mínútu fékk Maribor vítaspyrnu þegar Bjarni Ólafur Eiríksson felldi Martin Kramaric sem var nýkominn inn á sem varamaður.

Rok Kronaveter fór á punktinn og skoraði af öryggi - sendi Hannes Halldórsson í rangt horn.

Súrt 0-3 tap gegn sterku liði Maribor staðreynd og vonin lítil fyrir Val í seinni leik liðanna.

Valur fær frí í Pepsi Max-deildinni um helgina en seinni leikur þessara liða fer fram í Slóveníu eftir viku.