Birkir Bjarnason hefur skorað 25% af mörkum sínum fyrir íslenska landsliðið í leikjum gegn Frökkum.
Birkir hefur skorað tólf mörk í 80 landsleikjum en þrjú þeirra hafa komið í landsleikjum gegn Frökkum.
Árið 2012 skoraði Birkir í 3-2 tapi Íslands í vináttuleik gegn Frökkum.
Birkir skoraði aftur í 5-2 tapinu gegn Frökkum í 8-liða úrslitum á EM 2016 og síðan einnig í 2-2 jafnteflinu í vináttuleik í Guingamp í fyrra.
Birkir náði ekki að skora þegar Ísland tapaði 4-0 gegn Frökkum í mars en hann gæti bætt við marki gegn heimsmeisturunum í leiknum á Laugardalsvelli annað kvöld.
„Ég geri mitt besta og vonandi næ ég fleiri mörkum fyrir liðið. Það er alltaf markmiðið að ná fleiri mörkum," sagði Birkir í viðtali við Fótbolta.net í gær.
Hér að neðan má sjá viðtalið í heild.
Athugasemdir