Fínn sigur hjá Real.

Mynd: EPA

Real Madrid fékk Espanyol í heimsókn í dag í La Liga deildinni á Spáni en Real hafði gert tvö jafntefli í röð í deildinni og misst Barcelona enn lengra fram úr sér. Þá tapaði Real gegn Barcelona í fyrri leiknum í spænska bikarnum í byrjun mánaðarins.

Það byrjaði ekki vel fyrir Real í dag en Espanyol komst yfir snemma leiks með marki frá Joselu. Þeir hvítklæddu skiptu þá um gír og skoruðu tvö mörk fyrir hlé. Það gerðu þeir Vinicius Junior og Eder Militao.

Allt stefndi í að hálfleikstölurnar yrðu einnig lokatölur leiksins en seint í uppbótartímanum kláraði Spánverjinn Marco Asensio leikinn fyrir Real og tryggði stigin þrjú.

Real er sex stigum á eftir Barcelona sem á leik til góða en Espanyol er í þrettánda sæti deildarinnar. Real mætir Liverpool í síðari leik liðanna í Meistaradeild Evrópu á miðvikudaginn kemur en Real er með þriggja marka forystu eftir fyrri leikinn á Anfield.