Besta deildin: Patrick innsiglaði sigur Vals í síðari hálfleik

Það var fjörugur leikur á Hlíðarenda í kvöld þar sem KA var í heimsókn.

Fjörið hófst strax á fjórðu mínútu þegar Valur komst yfir en það var Hólmar Örn Eyjólfsson sem stökk hæst eftir hornspyrnu Gylfa Þórs Sigurðssonar og skallaði boltann í netið.

KA fékk vítaspyrnu undir lok fyrri hálfleiks og Hallgrímur Mar Steingrímsson skoraði af öryggi í sínum fyrsta leik í byrjunarliðinu á tímabilinu.

Stuttu síðar fékk Valur einnig vítaspyrnu en Steinþór Már Auðunsson gerði sér lítið fyrir og varði spyrnuna frá Gylfa.

Markahrókurinn Patrik Pedersen gerði út um leikinn með tveimur mörkum í síðari hálfleik. Bjarni Aðalsteinsson var nálægt því að klóra í bakkann en Hólmar Örn bjargaði á línu.