Besta deildin: Kjartan Kári tryggði FH þrjú stig fyrir norðan

Það var mikið fjör fyrir norðan í dag þegar KA og FH áttust við í síðari leik dagsins í Bestu deild karla í blíðunni fyrir norðan. KA gerði jafntefli gegn HK í fyrstu umferð á meðan FH tapaði gegn Breiðabliki í Kópavogi.

Gestirnir frá Hafnarfirði byrjuðu betur í dag og var það Vuk Oskar Dimitrijevic sem kom FH í forystu með marki úr vítaspyrnu. Rodri hafði þá brotið klaufalega á Birni Daníel en Björn kom inn í byrjunarliðið hjá FH í dag.

FH hélt áfram að hamra járnið á meðan það var heitt en Sigurður Bjartur Hallsson náði þá að skora mark af stuttu færi eftir að Kristijan Jajalo varði skot frá Kjartani Kára Halldórssyni út í teiginn.

Fjörið hélt áfram og náði Ásgeir Sigurgeirsson að minnka muninn fyrir KA eftir stoðsendingu frá Elfari Árna Aðalsteinssyni og staðan því 1-2 í hálfleik. Fjörið hélt síðan áfram í síðari hálfleiknum en Bjarni Aðalsteinsson jafnaði metin á 51. mínútu.

„Skelfileg mistök hjá Sindra! Fyrirgjöf úr aukaspyrnu sem hann á að grípa en missir boltann og hann berst til Bjarna sem klárar af stakri snilld," skrifaði Jóhann Þór í beinni textalýsingu.

Það var síðan Kjartan Kári Halldórsson sem gerði sigurmark gestanna eftir tæpan klukkustundarleik en skotið var laust og rúllaði í hornið framhjá Jajalo.

Viðar Örn Kjartansson kom inn á sem varamaður í liði KA en hann klúðraði algjöru dauðafæri seint í leiknum en honum mistókst þá að hitta á markrammann eftir sendingu frá Hrannari Birni.

Frábær sigur hjá FH staðreynd á Akureyri og er liðið því með þrjú stig eftir tvo leiki. KA er hins vegar búið með tvo heimaleiki og uppskeran einungis eitt stig.