Það er nóg um að vera í herbúðum Nottingham Forest þessa stundina þar sem félagið er nýbúið að tilkynna komu hins reynda Cheikhou Kouyate á frjálsri sölu eftir fjögur ár hjá Crystal Palace.

Kouyate, sem hefur einnig spilað fyrir West Ham í enska boltanum, er kröftugur miðjumaður og skrifar undir tveggja ára samning við Forest.

Kouyate verður 33 ára í desember og spilaði 27 úrvalsdeildarleiki fyrir Palace á síðustu leiktíð. Hann hefur í heildina spilað 258 úrvalsdeildarleiki á ferlinum, 129 hjá West Ham og 129 hjá Palace.

Kouyate á 82 landsleiki að baki fyrir Senegal og varð Afríkumeistari í vetur. Hann leikur sem varnartengiliður og getur einnig verið í miðverði.