Talað var um það í Innkastinu að Helgi Mikael Jónasson dómari eigi ekki von á jólakortum úr Árbænum ef Fylkismenn falla úr Pepsi Max-deildinni.

Fylkir er í fallsæti, einu stigi frá öruggu sæti, þegar tvær umferðir eru eftir af deildinni. Liðið tapaði 2-0 gegn KA á Akureyri um helgina en þegar staðan var markalaus hefði það átt að fá vítaspyrnu.

Mark Gundelach braut þá á Orra Hrafni Kjartanssyni.

„Þarna féll þetta svo sannarlega ekki með þeim. Það hefði verið fínt að komast yfir gegn KA liðinu á Akureyrarvelli, gegn liði sem hefur kannski ekki að neinu ævintýralega miklu að keppa," segir Tómas Þór Þórðarson.

„Þeir hefðu þá getað pakkað í vörn og verið með Rúnar Pál öskrandi á hliðarlínunni. Í staðinn fá þeir tvö mörk á sig í lokin og eru á leið niður um deild. Þeir fá ekki víti og hefðu átt að vera manni fleiri því það er ekki verið að reyna við boltann. Þetta verður stórt móment ef Fylkir verður Lengjudeildarlið eftir tvær vikur."

Fylkir á eftir að mæta ÍA á Akranesi á sunnudaginn og leikur svo gegn Val í lokaumferðinni.

Hvernig er þetta ekki víti & rautt ? #fotboltinet pic.twitter.com/znT28WYm2i

— Viktor Lekve (@viktorlekve) September 11, 2021