Bjarni Jóhannsson, þjálfari Njarðvíkur, var brosmildur í kvöld eftir jafntefli hans manna við Selfoss í Fótbolta.net mótinu.
Það var boðið upp á sannkallaða veislu í Reykjaneshöllinni en leiknum lauk með 4-4 jafntefli þar sem vantaði ekki upp á mörkin.
Bjarni tók við keflinu hjá Njarðvík eftir síðasta tímabil en hann leysti Mikael Nikulásson af hólmi sem var rekinn.
„Við erum búnir að vera í pásu í þrjá mánuði og náðum einni fótboltaæfingu í gærkvöldi fyrir þennan leik svo ég var þokkalega ánægður með frammistöðu minna manna. Fjörugur leikur, 4-4 og fjör á bekknum og líf í öllu. Það er bara flott að vera kominn af stað aftur," sagði Bjarni.
„Maður fann spennuna í loftinu og menn voru hungraðir að komast í leik. 4-4 og svona, þetta er bara skemmtilegt."
Bjarni viðurkennir á sama tíma að ástandið sé undarlegt en liðið var að spila sinn fyrsta leik í langan tíma sökum Covid-19.
„Það er alveg hárrétt. Þetta hefur verið frekar upp og niður þetta ár og mjög skrítið. Hér er grasið grænt og verður í höllinni alveg fram að móti.
Nánar er rætt við Bjarna í spilaranum hér fyrir ofan.
Athugasemdir