Finnur Tómas er tvítugur miðvörður sem steig sín fyrstu skref með KR-ingum árið 2019 eftir að hafa verið á láni hjá Þrótturum í Inkasso-deildinni árið áður.

Varnarmaðurinn ungi var keyptur til Norrköping snemma á síðasta ári en var lánaður til KR síðasta sumar.

Hann rifti samningi sínum við sænska félagið á dögunum og gerði fjögurra ára samning við KR-inga.

Pálmi Rafn, spilandi íþróttastjóri KR, fagnar þessum fréttum og segir hann langbesta varnarmann deildarinnar.

„Það er miklu meira en fínt. Það er algerlega frábært og leið mjög vel þegar ég heyrði þessar frétir," sagði Pálmi í útvarpsþættinum Fótbolti.net.

„Að mínu viti er hann besti og langbesti varnarmaður landsins þegar hann er á deginum sínum og við vitum að hann eigi alla möguleika á að fara aftur út í atvinnumennsku en við fögnum því svo lengi sem við höfum hann hérna í klúbbnum og vonum að hann spili á því leveli sem hann getur spilað á. Algerlega frábær leikmaður," sagði hann ennfremur.

Finnur Tómas var valinn efnilegasti leikmaður Pepsi Max-deildarinnar árið 2019 þegar KR varð meistari og spilaði þá með íslenska A-landsliðinu gegn Úganda og Suður-Kóreu á dögunum.