England: Man City með fingur á titlinum

Gylfi Þór Sigurðsson lék allan leikinn og bar fyrirliðabandið er Everton tapaði á heimavelli gegn toppliði Manchester City.

Man City var með yfirhöndina allan leikinn og tók forystuna snemma leiks þegar skot Phil Foden fór af varnarmanni og í netið.

Richarlison jafnaði þó skömmu síðar og voru gestirnir frá Manchester óheppnir að skora ekki fleiri mörk í fyrri hálfleik.

City stjórnaði síðari hálfleiknum en fékk þó ekki mikið af færum. Hins vegar nýttu menn færin sín þar sem Riyad Mahrez og Bernardo Silva gerðu út um viðureignina í síðari hálfleiknum.

Niðurstaðan sannfærandi sigur Man City sem er á blússandi siglingu og búið að vinna tíu fyrstu úrvalsdeildarleiki sína á nýju ári, sem er met.

City trónir á toppi úrvalsdeildarinnar með tíu stiga forystu á Man Utd og Leicester City.

Everton er í sjöunda sæti, fimm stigum frá Meistaradeildarsæti.