Framtíð hollenska miðjumannsins Frenkie de Jong hjá Barcelona er í óvissu.
Xavi vill ólmur halda honum innan sinna raða en Börsungar gætu selt De Jong til að rétta úr slæmri fjárhagsstöðu.
„Ég hef oft sagt það að De Jong er lykilmaður í mínum áformum en við megum ekki gleyma aðstæðum og fjárhagslegum skuldbindingum félagsins," sagði Xavi.
Joan Laporta, forseti Barca, tók í svipaða strengi og aðalþjálfarinn.
„Ég veit ekki hvort við þurfum að selja mikilvæga leikmenn í sumar. Kannski þurfum við þess ekki en ég veit það ekki eins og staðan er í dag. Fjárhagurinn er í forgangi."
Barca gæti verið að missa Ousmane Dembele frá sér á frjálsri sölu í sumar. Félagið getur ekki boðið honum jafn góðan samning og helstu keppinautar í Evrópu.
De Jong er talinn vilja vera áfram hjá Barcelona til að spila í Meistaradeildinni.
Erik ten Hag, sem hefur þjálfað Ajax undanfarin fimm ár, vill sannfæra fyrrum lærling sinn um að ganga til liðs við sig og Donny van de Beek hjá Manchester United.
