England: Sigurmark Matip heldur titilvonum Liverpool á lífi

Liverpool er ekki búið að missa af Englandsmeistaratitlinum eftir góðan sigur á útivelli gegn Southampton í kvöld.

Jürgen Klopp hvíldi níu mikilvæga byrjunarliðsmenn í leiknum og tefldi því fram hálfgerðu varaliði, sem var þó við stjórn allan tímann.

Nathan Redmond kom heimamönnum yfir eftir laglegt einstaklingsframtak snemma leiks. Skot hans utan teigs fór af varnarmanni og í netið en þetta reyndist eina marktilraun Southampton sem hæfði rammann í leiknum.

Takumi Minamino var ekki lengi að jafna eftir góða sókn og stoðsendingu frá Diogo Jota og var staðan 1-1 í hálfleik.

Liverpool hélt áfram að stjórna gangi mála eftir leikhlé og skoraði Joel Matip það sem reyndist vera sigurmarkið með glæsilegum skalla eftir hornspyrnu á 67. mínútu.

Southampton reyndi að sækja á lokamínútunum en það gekk ekki og virtist sigur Liverpool aldrei í hættu eftir skallamark Matip.

Liverpool er einu stigi eftir Manchester City fyrir lokaumferðina. Liðið þarf að vinna heimaleik gegn Wolves og treysta á að Aston Villa taki í það minnsta stig á Etihad Stadium um helgina.