Sóknarmaðurinn Danny Welbeck hefur skrifað undir eins árs samning við Brighton.
Hinn 29 ára gamli Welbeck var félagslaus eftir að samningi hans við Watford var rift í þessum mánuði.
Welbeck kom til Watford frá Arsenal í fyrra en hann var áður á mála hjá Manchester United. Hann skoraði þrjú mörk í tuttugu leikjum með Watford þegar liðið féll úr ensku úrvalsdeildinni á síðasta tímabili.
Welbeck hefur skorað 44 mörk og lagt upp 20 í 224 leikjum í ensku úrvalsdeildinni.
Watford ákvað að leyfa Welbeck að fara þar sem hann er með háan launapakka.
Hann er núna kominn til Brighton, sem er í 16. sæti ensku úrvalsdeildarinnar með þrjú stig. Brighton mætir erkifjendum sínum í Crystal Palace klukkan 13:00 í dag.
Athugasemdir