Ekki verður hægt að kaupa áfengi á leikvöngum mótsins eftir að yfirvöld í Katar settu bann á það í gær, aðeins tveimur dögum fyrir mótið.

Umræðan í kringum þessa ákvörðun er heit enda óvíst hvað yfirvöld taka upp á í kjölfarið. Stuðningsfólk var svikið um bjór og þá voru dagpeningar teknir af fólkinu sem var boðið sérstaklega á mótið til að búa til jákvæða umfjöllun um landið.

Dier, leikmaður enska landsliðsins, sér glasið hálf fullt, en hann segir það nú undir liðinu komið að sjá til þess að stuðningsfólkið þurfi engan bjór.

„Ég er á þeirri skoðun að það sé hægt að skemmta sér án áfengis. Nú er það undir okkur komið að skemmta fólki og spila frábæran fótbolta. Það getur búið til andrúmsloft á vellinum,“ sagði Dier.