Þessi tillaga hefur fengið gríðarlega mikla gagnrýni, meðal annars frá Atalanta og Roma á Ítalíu en þrjú ítölsk félög eru meðal stofnfélaga. Juventus, Inter og AC Milan.

„Það er undirstöðuatriði í fótbolta að smærra liðið á alltaf möguleika á að sigra gegn stærra liðinu. Í Ofurdeildinni myndu félög eins og Arsenal og Tottenham taka þátt á hverju ári án þess að verðskulda það. Þetta fyrirkomulag myndi breyta knattspyrnuheiminum að eilífu," sagði Gosens við Kicker.

„Það er fólk að deyja um allan heim, það vantar pening í innviði samfélagsins en þessi tólf félög ætla að stofna sína eigin deild til að troða 100 eða 150 milljónum upp í rassgatið á sér. Er það siðferðislegt? Þetta er mjög sorglegt en í enda dagsins snýst þetta bara um peninga, peninga og peninga."

Atalanta er fullkomið dæmi um lítið félag sem hefur stækkað gífurlega mikið á undanförnum árum og vakið verðskuldaða athygli um alla Evrópu.