Spánarmeistarar FC Barcelona taka á móti ríkjandi Evrópumeisturum Paris Saint-Germain í deildarkeppni Meistaradeildarinnar 1. október.
Ekki er hægt að spila leikinn á Camp Nou vegna vandamála með skráningu á leikvanginum, en Börsungar hafa á undanförnum árum verið mikið að lenda í slíkum vandræðum þó það sé aðallega með leikmenn.
Það má heldur ekki spila leikinn á Estadi Johan Cruyff vegna þess að hann mætir hvorki stærðar- né öryggiskröfum sem UEFA gerir í Meistaradeildinni.
Leikurinn verður því spilaður á Estadi Olímpic Lluís Companys, Ólympíuleikvanginum í Barcelona.
Börsungar hafa áður nýtt sér þennan leikvang til að hýsa heimaleiki og höfðu hugsað sér að gera það einnig í spænsku deildinni þegar vandamál í kringum skráningu á Camp Nou komu í ljós.
Það hefur þó ekki gengið hingað til vegna annarra bókana á leikvanginum sem er mjög eftirsóttur fyrir hina ýmsu viðburði og hátíðir.
Barca og PSG byrjuðu bæði deildarkeppnina á sigri.
Barca marði Newcastle á útivelli á meðan PSG lagði Atalanta að velli með fjögurra marka mun.
Athugasemdir
