Á miðlinum Sports24.ru er greint frá því að fimm félög hafi áhuga á því að fá Hörð Björgvin Magnússon í sínar raðir en hann er á förum frá CSKA Moskvu þar sem samningur hans rennur út um mánaðarmótin.
Tvö rússnesk félög eru nefnd í greininni og eru það Krasnodar og Torpedo Moskva. Þar segir einnig að þrjú félög utan Rússlands hafi boðið Herði samning.
Franska félagið Strasbourg er eitt þeirra. Liðið endaði í sjötta sæt í frönsku Ligue 1 í vetur. Þýska félagið Augsburg er einnig nefnt en það endaði í 14. sæti í Bundesliga. Alfreð Finnbogason hefur leikið með félaginu síðustu ár en hann er farinn frá félaginu.
Síðast á lista er Basel í Sviss sem endaði í 2. sæti svissnesku deildarinnar. Fyrr í sumar var fjallað um áhuga enska félagsins Sheffield United og AEK í Grikklandi á landsliðsmanninum.
Hörður Björgvin sneri til baka úr meiðslum á þessu ári eftir að hafa slitið hásin í fyrra. Hann kom við sögu í fjórum leikjum með CSKA á tímabilinu en þar hefur hann verið síðan sumarið 2018.
Hörður byrjaði alla þrjá leiki íslenska landsliðsins í Þjóðadeildinni í þessum mánuði.
Athugasemdir
