Ítalía: Mkhitaryan skoraði og lagði upp gegn Lecce

Henrikh Mkhitaryan og Edin Dzeko áttu góðan leik er Roma lagði Lecce auðveldlega að velli.

Mkhitaryan lagði fyrsta mark leiksins upp fyrir Cengiz Ünder eftir að hafa unnið boltann hátt uppi á vellinum. Hann tvöfaldaði svo forystu Roma eftir sendingu frá Dzeko og var staðan 2-0 í leikhlé.

Dzeko gerði þriðja markið á 69. mínútu og fullkomnaði Aleksandr Kolarov sigurinn á lokakaflanum.

Roma er áfram í fimmta sæti eftir sigurinn, þremur stigum frá Atalanta sem er í Meistaradeildarsæti og á leik til góða.

Þetta var síðasti leikur dagsins í ítalska boltanum enda fjórum leikjum frestað vegna kóróna veirunnar.