Pierre-Emerick Aubameyang verður vafalítið í byrjunarliði Arsenal og var Klopp spurður út í sóknarmanninn, enda störfuðu þeir saman hjá Borussia Dortmund á sínum tíma.

„Það eru fjögur ár síðan ég vann með honum. Í kanttspyrnuheiminum í dag þá vita allir allt um alla, það er ekkert sem kemur á óvart ef þú undirbýrð þig vel," sagði Klopp þegar hann var spurður út í helsta veikleika Aubameyang.

„Auba hefur enga veikleika fyrir utan fatastílinn sinn."

Liverpool tókst að halda Aubameyang í skefjum á síðustu leiktíð og vann heimaleikinn 5-1 á meðan leiknum á Emirates lauk með 1-1 jafntefli.

„Okkur hefur tekist að verjast honum hingað til en það er aldrei hægt að gera það 100% útaf hraðanum sem hann býr yfir. Við vitum af þessu og þurfum að stöðva hann aftur eins og í síðustu leikjum.

„Hann var kantmaður þegar við fengum hann fyrst til Dortmund en með tímanum áttuðum við okkur á því hversu góður hann væri sem fremsti maður. Hann leysti Robert Lewandowski af hólmi eftir að við seldum hann til Bayern.

„Hann þróaði leik sinn mikið, skipti um stöðu á vellinum og var algjör markavél."

Aubameyang er ekki eini leikmaður Arsenal sem lék undir stjórn Klopp hjá Dortmund. Henrikh Mkhitaryan og Sokratis voru einnig lærlingar hjá Klopp.