Aston Villa hefur tilkynnt það að íslenski landsliðsmaðurinn Birkir Bjarnason sé genginn í raðir félagsins. Þetta tilkynnti félagið á Twitter síðu sinni en stuttu áður hafði eigandi félagsins, kínverski viðskiptamaðurinn Tony Xia, byrjað að fylgja Birki á samskiptamiðlinum.
Birkir er 28 ára og er gríðarlega vinsæll hjá íslenskum fótboltaáhugamönnum enda verið lykilmaður í íslenska landsliðinu. Í sumar skoraði hann fyrsta mark Íslands á stórmóti þegar hann skoraði gegn Portúgal í fyrsta leik riðilsins, hann skoraði einnig gegn Frökkum í 8-liða úrslitunum.
BBC segir að kaupverðið sé 1,75 milljón punda sem er í kringum 255 milljónir íslenskra króna. Hann skrifaði undir þriggja ára samning við Villa.
Birkir getur spilað allar stöður á miðsvæðinu. Steve Bruce er knattspyrnustjóri Aston Villa sem situr í þrettánda sæti Championship-deildarinnar. Forráðamenn félagsins vilja koma liðinu sem fyrst upp í deild þeirra bestu og binda vonir við að liðið nái á þessu tímabili að blanda sér í baráttu um umspilssæti.
„Ég er ánægður með að hafa samið við Aston Villa," sagði Birkir eftir undirskriftina. „Þetta er mjög stórt félag. Ég hlakka núna til að fara út á völl og hjálpa liðinu."
Birkir verður fimmti íslenski landsliðsmaðurinn í Championship deildinni en þar leika einnig Aron Einar Gunnarsson (Cardiff), Hörður Björgvin Magnússon (Bristol City), Jón Daði Böðvarsson (Wolves) og Ragnar Sigurðsson (Fulham).
Birkir hóf meistaraflokksferil sinn hjá Viking í Noregi en hann hefur síðan þá leikið með Standard Liege í Belgíu, Pescara og Samporia á Ítalíu sem og Basel.
Fyrsti leikur Birkis fyrir Aston Villa gæti verið næsta þriðjudag en þá er deildarleikur gegn Brentford.
Athugasemdir