Fótbolti.net

sun 25. janúar 2026 16:08

Brynjar Ingi Erluson

England: Chelsea skoraði þrjú og Wharton sá rautt - Góður sigur Aston Villa

Estevao skoraði og lagði upp

Mynd: EPA

Adam Wharton sá rautt

Mynd: EPA

Ollie Watkins gulltryggði Aston Villa sigur á Newcastle

Mynd: EPA

Heims- og Sambandsdeildarmeistarar Chelsea unnu öruggan 3-1 sigur á bikarmeisturum Crystal Palace í 23. umferð ensku úrvalsdeildarinnar í dag. Aston Villa er þá fjórum stigum frá toppnum eftir að hafa unnið 2-0 sigur á Newcastle United á St. James' Park.

Brasilíumaðurinn Estevao var í byrjunarliði Chelsea í stað Cole Palmer og nýtti tækifærið vel.

Á 34. mínútu átti Jaydee Canvot, varnarmaður Palace, hræðilega sendingu til baka og beint í hlaupaleið Estevao sem keyrði upp völlinn og afgreiddi boltann snyrtilega í markið.

Samlandi Estevao, Joao Pedro, bætti við öðru snemma í síðari hálfleik eftir undirbúning frá þeim fyrrnefnda og kom síðan þriðja markið úr vítaspyrnu frá Enzo Fernandez eftir að Canvot handlék boltann eftir skot Joao Pedro.

Canvot var tekinn af velli stuttu síðar enda ekki að eiga sinn besta leik.

Palace-mönnum fækkaði niður í tíu þegar þeirra mikilvægasti maður, Adam Wharton, sá tvö gul spjöld á fimm mínútum og heimamenn manni færri síðustu tuttugu mínúturnar.

Manni færri tókst þeim samt að minnka muninn eftir hornspyrnu er Chris Richards réðst á skoppandi bolta og stangaði honum í netið.

Lengra komust bikarmeistararnir ekki. Chelsea er í 4. sæti með 37 stig en Palace í 15. sæti með 28 stig, átta stigum fyrir ofan fallsæti.

Mikilvægur sigur Forest

Fallbaráttulið Nottingham Forest vann ótrúlega mikilvægan 2-0 sigur á Brentford í Lundúnum.

Brasilíumaðurinn Igor Jesus skoraði á 12. mínútu leiksins. Hann sýndi styrk sinn eftir háa fyrirgjöf, hélt varnarmanninum frá sér og kláraði með góðu skoti.

Taiwo Awoniyi gerði síðan annað markið tíu mínútum fyrir lok venjulegs leiktíma með skoti hægra megin úr teignum. Góður sigur Forest sem er nú fimm stigum fyrir ofan fallsæti en Brentford í 8. sæti með 33 stig.

Aston Villa vann á St. James' Park

Aston Villa vann frábæran 2-0 sigur á Newcastle United á St. James' Park.

Emi Buendía skoraði stórbrotið mark á 19. mínútu með skoti fyrir utan teig og efst í vinstra hornið.

Samlandi hans Emi Martínez átti síðan síðar í hálfleiknum frábæra vörslu eftir skalla frá Lewis Miley.

Ollie Watkins var hættulegur í þeim síðari. Nick Pope varði frábært langtskot hans en kom engum vörnum við er hann stangaði fyrirgjöf Lucas Digne í netið á 87. mínútu.

Glæsilegur sigur Villa sem er áfram í 3. sæti með 46 stig, fjórum stigum frá toppnum en Newcastle í 9. sæti með 33 stig, fjórum stigum frá Meistaradeildarsæti.

Crystal Palace 1 - 3 Chelsea
0-1 Estevao ('34 )
0-2 Joao Pedro ('50 )
0-3 Enzo Fernandez ('64 , víti)
1-3 Chris Richards ('88 )
Rautt spjald: Adam Wharton, Crystal Palace ('72)

Newcastle 0 - 2 Aston Villa
0-1 Emiliano Buendia ('19 )
0-2 Ollie Watkins ('88 )

Brentford 0 - 2 Nott. Forest
0-1 Igor Jesus ('12 )
0-2 Taiwo Awoniyi ('79 )

		L	U	J	T	ms:	mf:	mun	Stig
1	Arsenal	31	21	7	3	61	22	+39	70
2	Man City	30	18	7	5	60	28	+32	61
3	Man Utd	31	15	10	6	56	43	+13	55
4	Aston Villa	31	16	6	9	42	37	+5	54
5	Liverpool	31	14	7	10	50	42	+8	49
6	Chelsea	31	13	9	9	53	38	+15	48
7	Brentford	31	13	7	11	46	42	+4	46
8	Everton	31	13	7	11	37	35	+2	46
9	Fulham	31	13	5	13	43	44	-1	44
10	Brighton	31	11	10	10	41	37	+4	43
11	Sunderland	31	11	10	10	32	36	-4	43
12	Newcastle	31	12	6	13	44	45	-1	42
13	Bournemouth	31	9	15	7	46	48	-2	42
14	Crystal Palace	30	10	9	11	33	35	-2	39
15	Leeds	31	7	12	12	37	48	-11	33
16	Nott. Forest	31	8	8	15	31	43	-12	32
17	Tottenham	31	7	9	15	40	50	-10	30
18	West Ham	31	7	8	16	36	57	-21	29
19	Burnley	31	4	8	19	33	61	-28	20
20	Wolves	31	3	8	20	24	54	-30	17